A MIA TRAZA DE PREXINAR

Astí, en España, bi-há muita chent que creye que sólo bi-há cuatro luengas: lo castellán, ta tot lo territorio, lo gallego, lo basco y lo catalán. Muita chent conixe atras luengas se bibe allí, en los territorios an se i fablan. Pero no quieren que sigan ofizials. No les cuaca. Á yo me cuacarba saper si aquers españols que dizen que esfienden la cultura d'España, esfienden las luengas como l'asturiano, l'aragonés, l'estremeño u l'andaluz. Me agradarba saper si ers conixen lo lumero de luengas que bi-há astí.

En España, charran atra luenga que no siga lo castellán te fa estar nazionalista. Es berdat. Si esfiendes que se i charre aragonés u catalán yes un nazionalista, una presona que ye en lo pasau.

Esfender las luengas d'España no lo fan toz los partitos puliticos. Sólo los nazionalistas. Los atros, no charrar muito d'eras. Pero si yes en Cataluña y no charras lo catalán, cosas bas á fer. Charrar una luenga como ye lo castellán ye important, ye berdat, porque lo charran más de 300 millons de presonas, porque ye una luenga que no dixa d'abrir puertas. Pero astí, en España, no sólo ye lo castellán. Astí se i charra lo gayego, lo basco, lo catalán, lo balenziano... Istas luengas son ofizials en los suyos territorios. Pero, ¿l'asturiano, l'aragonés, l'estremeño...? Las luengas que no son ofizials. ¿Qui las esfiende? Los partitos nazionalistas. Porque ers esfienden la suya cultura, la cultura de los territorios que fan d'iste país un país con cultura.

Lo nuestro país ye un país con muito patrimonio lingüistico, con muito. Pero nusatros no sapemos querer-lo, aimar-lo. Muitos españols charran con disprezio de las culturas que forman iste país y dimpués, se'n claman "patriotas".

La chent charra muito de Cataluña. Agora ye un echemplo. Ta yo, Cataluña ye un echemplo de luita por la cultura de la tierra. Entre Franzia y España, intentan amortar ixe territorio. Pero los catalans luitan por poder bibir en catalán. ¿Qué pasa en Aragón? ¿Qué se fa en Aragón por ista luenga? Un Abamproyeuto de Lai. Ixo no ye garra. Las luengas d'Aragón aberban d'estar ofizials en lo territorio aragonés. Las luengas d'Aragón no son protechidas. Á los politicos no les cuaca ascuitar fablar d'isto. Ye bella cosa con cuala tien de tener cudiáu.

L'abamproyeuto de Lai tién como ochetibos
a) Fer efeutibo lo dreito de los ziudadanos á conoxer y usar las luengas propias d'Aragón.
b) Protecher las luengas y bariedaz dialeutals propias d'Aragón como elementos bibos de lo patrimonio cultural aragonés.
c) Fomentar la suya recuperazión y lo suyo desembolicamiento, empentando las midas prezisas ta ixo.
d) Abuegar los territorios en los que cadaguna d'eras ye luenga propia.
e) Guarenziar lo suyo uso y amostranza.
f) Fomentar la proyezión esterior de las luengas d'Aragón y la comunicazión cultural entre los diferens territorios de cada luenga.

Á yo me cuacarba beyer plegar lo diya en cualo los ninos d'Aragón puedan estudiar como lo fan los de Cataluña, en la luenga propia. Dica ixe diya, podemos beyer isto en l'autualidat y fer lo posible por desembolicar las luengas d'Aragón.