A MIA TRAZA DE PREXINAR

En istes tiempos ya la chent no parixe querer charrar la luenga d'Aragón. Es más chicoz no la pueden aprender en l'escuela y es mayors beyen como la suya luenga, en cuala bel diya es suyos pais les charroron, ye esmortezindo, dica plegar á estar sólo que en lo recuerdo.

Pero, anque se charre poco, tién muita presenzia en Internet: es blogs, la Biquipedia, pachinas y pachinas con ista luenga escrita. Ye un buen escomienzo t'amostrar-la á lo mundo.

Pero, charrar, lo que ye fablar la luenga, se fabla? Es aragoneses la charran? No creigo que as presonas de Tergüel conixcan muito l'aragonés (y só charrando de l'aragonés, de la luenga, no de ixo clamau "habla baturra" que ye un castellán con muitas parabras aragonesas). L'aragonés deberba d'estar fabláu'n Aragón, porque ye la luenga d'iste país. Anque aiga chent que pueda pensar que abans se'n teneba bergüeña, bergüeña de charrar. Agora ya pasó lo tiempo de tener bergüeña, pasó lo tiempo d'estar dixando acotolar la cultura y la luenga d'Aragón. Ya no ye tiempo de dixar-mos amortar. Luitar ye lo berbo que deberban conixer es aragoneses. Pero ixe berbo, ye mui zerca d'atro: CHARRAR.

La nuestra luita estará la fabla, que sía la fabla, la fabla d'Aragón. Argüello de toz es aragoneses, argüello de todas las presonas que biben n'ixa tierra, n'ixa tierra que Dios pusió baxo lo zielo.

Cuán parixeba que l'aragonés s'eba á callar ta cutio, s'eba a dixar acotolar, resurchió con fuerza y chiló entalto lo suyo poder, la suya machia, tan antigua como la tierra de lo zierzo, tan bella, tan bella como es Perinés y lo zielo, un zielo, que mos aduya a beyer que, antis u dimpués, es aragoneses, charrarán la suya luenga sin la bergüeña d'abans.